A. UGA GARA, SE***
DAWEN JAWAU MANDER MANJUHAN
Dia luwen kapusang Kantal. Mahimba malan manana kahana pemerintah. Manyedot amas cara kana razia. Handak mamantat gita, manetes uwei rega sasar murah. Regan je huang pasar uras hai.
Ongkos ewen hanak mulai isut sasar isut. Behas dinun butang. Dia ulih nahiu hindai hapa mili kare sayur, apalagi laok. Tulak misi, tamam ndai dinun laok saluang. Sanunuh tege, dia ulih kia akan balut ewen hanak hamanantu.
Kantal manyuhu kabali Nyai (Indu Supak) manggau dawen jawau huang kaliling huma. Kabali dumah lalu manempe huang lisung. Dawen jawau sama baya-baya kare. “Mangat padan tuh dengan tampik balasan,”kuan Indu Supak pander kabuat.
Lento-lentong auh tempen dawen jawau Indu Supak. Kantal jatun ih gawi. Pes-pes maruku, ruku bagulung dawen jagung sambil mamicik handphone. Padahal jatun pulsa, awi jatun duit hapa mili.
Ngariring sinde telpon Kantal. Payah, Taguh je manelpon. “Buhen Guh,” kuan Kantal manjawab telepon bara Taguh. “Maja akan huma,” kuan Taguh. “Yoh, limbas kuman,” kuan Kantal.
Sana birik lenge ih, kantal maja akan huma Taguh. Sampai human Taguh, Kantal palus tame huma. Taguh jadi nunggu hayak siap puat tulak misi. “Narai gawim Bapa Supak” kuan Taguh misek Kantal.
“Jatun ih,” kuan Kantal, manjawab pisek Taguh. “Amun kute kue tulak misi ih. Jatun bara balut tuh,” kuan Taguh mimbit Kantal. “Akai lah limbas kuman ih aku. Birik lenge langsung akan hetuh ih,” kuan Kantal.
“Hau narai balut. Pasti laok hai. Endau hiningku huang telpon lento-lentong sinde auh sangkalan,” kuan Taguh, sambil baharap mikeh ayau Kantal manawar akan huma kuman.
“Yoh, balut laok manjuhan dinun mili kia. Tapi lepah ndai. Tawam ih anak sama are, manantu ije due, sinde natai ih je ije kilu kau,” kuan pander tanjarun Kantal, hayak hetang tatawe mamparahan kasinga.
“Boh leha je uras rutik dawen jawau huang kasingam kau,” kuan Taguh. “Maka au nah limbas kuman balut laok manjuhan. Sampai lento-lentong auh ketah huang sangkalan,” kuan Taguh manarus pander.
“Tutu balut laok manjuhan. Huang kasingatuh nah rutik dawen jawau tisa andau male,” kuan lecak pander tanjarun Kantal. Awi iye mahamen mander arep kuman balut tempen dawen jawau, tampik balasan.### panting pana_uga.
(Penulis adalah wartawan beritasampit.co.id)
