A. UGA GARA, SE***
PALUI MANYASAL UMBA AREP, HADARI AKAN BANJARMASIN….
HONG Lewu Sarunai tege pemuda ara Palui. Anak Tambir andue Bahalai. Tambir tuh pahari ije kalambutan dengan Kantal. Sementara Bahalai tuh pahari ije kalambutan dengan Taguh.
Metuh umur Palui ije nyelu, Tambir matei. Kana panyakit kasadingen hayak muta mamani. Jadi Palui tuh dia iye kasene kilen ampi tampa baun matan bapa. Palui pajang hai, barigas biti bereng, belum awi indu.
Selama bapa matei. Palui andue hindu belum cara mandukuh malan manana melai hulu Sungei Bure. Kanatek ih buli akan lewu Sarunai. Bara kakurik sampai tutuk kabujang Palui dia puji sakula. Huruf A kahain lontong mahi nantarang.
Sinde andau Palui misek Indu. “Hong kueh eka melai je bapa nah mai?” kuan pisek Palaui dengan indu. “Jadi matei,” kuan indu mander akan Palui.
“Kilen ampi uluh je matei nah mai?” kuan Palui haluli misek indu. “Hauu..uluh matei nah bahewau maram. Sama ewau ketut te ih,” kuan indu dengan Palui.
Indu mameh. Dia ulih manjelas akan Palui. Kilen ampi sabujur uluh te je matei. Palui lebih mameh hindai, dia ulih iye maham auh indu. Kilen ampi uluh je matei te.
Hong sinde andau. Lius kaput. Palaui andue indu kuman. Jadau-jandau te andue kuman cara balut peja/karondam laok tampahas jadi buntau buah tuwe.
Metuh anduei indu kuman. Ngetut indu Palui. Katut ewau maram. “Umai matei, umai matei..!!” kuan Palui. “Dia matei. Belum ihhh.. aku,” kuan indu. “Dia. Puna matei umai..!!” kuan Palui nangkar auh indu.
Narai taluh ati, ngubur aka indu te belum-belum ih huang penda batang asem metuh rahat mua. Ara je buah timbun penda petak, matei Indu Palui.
Kantal andue Taguh jalanan mandup, maja ekan dukuh Indu Palui. “Kueh indangmu Palui?” kuan Taguh misek Palui. “Jadi matei,” kuan Palui. “Hauu..leha dia ikau sanan akan ikei,” kuan Kantal, nyambung pisek Taguh. “Jatun waktuku buli akan lewu, je jadi ewau maram ndai,” kuan Palui.
Kantal andue Taguh haluli nguan jalana mandup. Dia pire andau limbas kajan mama Kantal andue Taguh. Palui ngetut ewau maram kia. “Hau kuan Palui. Matei kia aku tuhhh..,” kuan Palui pander kabuat.
Narai taluh ati. Matei kua umba arep-nah. Palui manggali kubur kabuat. Tukep kuburan indu. Nimbun kuburan tisa takuluk dengan lenge. Bitep-bitep matan palui nyarenan arep. Nyamuk mik-mak mepet pinding tuntang lenge.
Dumah riwut, mandadap bua asem manjatu kana takuluk Palui. Kamea pehe, tarewen Palui. “Hau, dia matei aku tuh,” kuan Palui. Hayak harikas punduk arep. Palus kia iye sadar umba taluh gawi sala je jadi ngubur indu belu-belum nah.
Nyasal Palui umba taluh gawi. Hadari puntang-panting Palui bara dukuh eka andue indu akan padang himba sampai tembus Banjarmasin. Tuh kesah asal-muasal Palui je hong Banjar Masin nah. #PanderPantingPana
(Penulis adalah wartawan beritasmapit.co.id)
