​Cerita Anak Dayak Kalteng “Pander Panting Pana” Bagian (13)

    “TAGUH MUNU BAWUI TAROK LENTANG”

    KUALA KURUN – Hong sinde andau, Taguh tulak mandup. Mihir asu telu kungan. Kejau tanjung Taguh manyuru padang himba, palus dia hasupa deang bawui. Matan andau jadi mulai santah akan hila pambelep. Tanjung taguh tembus eka teweng tanan Kantal. Silan bahun Kantal nyelu male.

    Narai taluh ati. Mangang asun Taguh. Putang-panting taguh guang pangang asu jadi batahan. Sampai hete gite rajan baranian Bawui. Hong lawin teweng lentang akan tanan Taguh. Tutu jadi batahan. Taguh dia bahanyi je gara-garap madu langsung mamunu. Iye manunggu ampin Bawui te heka. Cara jam asu Taguh mudar baranian jikau, haru tau bahanyi Taguh manukep.

    Narai taluh ati. Gitan Taguh Bawui kau jadi sahuruk penda ranggau lentang teweng tanan Kantal nah. Palus iye mamunu. Sinde handue munu awi Taguh, matei. Buli Taguh metun sapak Bawui. Sampai huma. Rami uluh lewu habagi-habicat. Tege je mili akan ije kilu. Tege kia telu kilu. Dumah Kantal akan huma Taguh handak balaku bagi kia.

    “Teraiii..narai kare ikau mli. Kuman je tege kau ih. Hanjewu kareh kue mules akan bahum kanih duan tisa,” kuan Taguh umba Kantal. “Iyoh kia,” kuan Kantal manumbah auh Taguh. Sambil manunggu balut masak. Bakesah Taguh mander arep dinun Bawui akan Kantal. “Sadang tanjung marudat padang himba kanih. Hining auh asu mangang huang tarok lentang. Tukep bahum-nah,” kuan kesah Taguh umba Kantal.

    Heran Kantal. “Dia mungkin Bawui huang tarok lentang. Kilen ampi iye mandai?” kuan Kantal. “Jewu ikau payah,” Kuan Taguh. “ Iyoh kia,” kuan Kantal. Harap Kantal nyeneh pander Taguh. Puna nyewut tutu kesah Taguh. Rami iye mangesah akan uluh Lewu Sarunai. Taguh dinun Bawui, mamunu huang tarok lentang. ##PantingPana

    (Penulis adalah wartawan beritasmapit.co.id)

    (Visited 5 times, 1 visits today)