ASAL KESAH HANTUEN: ANGKES ANDUE TAHUMAN KAWIN
TAGUH haluli manyambung kesah. Anak esun ayu jadi uras siap manyeneh kesah asal usul hantuen. Huang andau jekalime tuh, Taguh masih mangeasah Laok Tahuman jadi kalunen sampai kawin manak manjarua. Kutuh auh kesah.
Anak awo bawi manjalama bara Laok Tahunan dinun Antang Taoy nyuar nah, hanjulu tutu hai jadi bawi bujang bahalap. Angkes, anak angkat Antang Taoy andue Tapih, mipen kahalap bawi jalama bara Laok Tahuman kau nah.
Kute kia kahandak atei bawi Tahuman, iye mipen kia kakenan Angkes. Kilau kuan anak muda wayah tuh nah, kahandak andue jadi sama “klik”. Antang Taoy andue kabali Tapih tinggal malalus kahandak Tahuman dan Angkes.
Pandak kesah andue kawin. Dengan acara adat metuh jaman te. Andue belum hinje hong kasanang atei. Maklum ara je panganten baru. Biar kuman balut tampik balasan, tatap mangat akan pasangan panganten taheta.
Asal hamalem andau. Hining auh je huang kamar kau cara hagu-hagur. Auh ranjang laseh papan, rut-ret sinde. Aluh kute. Antang Taoy andue kabali Tapih, paham tutu. Ara mahi panganten taheta.
Dia pire katahin andau limbas mangawin Angkes andue Tahuman. Tapih malahir anak ije sulak. Dia sampai ije nyelu umur anak awo bara pasangan Angkes andue Tapih, haban lalu matei.
Pasangan Angkes andue Tahuman huang kahanjak atei. Tahuman batihi. Sampai bulan tihi, Tahuman manak. Sama kia, hindai ije nyelu umur, anak Angkes andue Tahuman matei. Dan langsung kia ingubur dengan cara adat kebiasaan jaman te.
Miar nyelu, sampai ukur maniwah anak Antang Taoy dengan Tapih. Anak Angkes andue Tahuman. Kuan uluh lewu Baras Ngahai kau. Amun hindai Tiwah, hindai sampai akan lewun Ranying Hatalla Langit melai huang Balai Bulau Napatah Intan.
Kuan kepercayaan ewen Kaharingan. Agama ije sulak uluh Dayak.
Agama ije anut Antang Taoy hakabali, hanak hamanantu. Balai Bulau Napatah Intan te huang langit ije inyewut Bukit Bulau Kagantung Gandang Kereng Rabia Nunjang Hapalangka Langit (Surga).
Hindai lepah kesah Taguh.
Ampin kawan anak esu jadi sama ngabtuk. Kute kia je Taguh. Iye paham ngantuk. Apalagi handau bagawi daras huang tana, metuh wayah durik teweng. “Jewu hindai aku nyambung kesah,” kuan Taguh. #HantuenSeriKalime
